Ռոլան մանկապատանեկան ֆիլմերի միջազգային փառատոնը, որի կազմակերպիչն է Հայաստանի «Ռոլան Բիկովի Ֆոնդը»-ը այս տարվանից՝ 2026 թվականից վերանվանվել է «ՄանուՖեստ» մանկապատանեկան ֆիլմերի միջազգային փառատոնի, որի կազմակերպիչը հանդիսանում է Կինոյի և Հեռուստատեսության Զարգացման Հայկական Հիմնադրամը Երեխաների և Պատանիների համար՝ արդեն վերանվանված՝ «Մանու Ֆոնդ»-ը։

2026 թ․-ին նոյեմբերի 3-ից 7-ը  տեղի կունենա  «ՄանուՖեստ» 22-րդ մանկապատանեկան ֆիլմերի միջազգային փառատոնը։

 «ՄանուՖեստ» մանկապատանեկան ֆիլմերի միջազգային փառատոնի հիմնական նպատակներից է մշակութային, կրթական, մարդու իրավունքների և սոցիալական ծրագրերի իրականացումը՝ ուղղված երեխաների և երիտասարդների ազգային և համամարդկային արժեքների ձևավորմանը և բազմակողմանի զարգացմանը։ 

«ՄանուՖեստ» մանկապատանեկան միջազգային կինոփառատոնի նպատակներից են նաև՝ ապահովել երեխաների և երիտասարդների հասանելիությունը կինոյին և մշակույթին, խթանել ստեղծագործական կրթությունը, նպաստել և զարգացնել միջմշակութային երկխոսությունն ու միջազգային համագործակցությունը, նպաստել երիտասարդ սերնդի ստեղծագործական ներուժի բացահայտմանը և Հայաստանի ակտիվ ներգրավմանը միջազգային մշակութային դաշտում:

«ՄանուՖեստ» փառատոնը՝ որպես միջազգային մշակութային հարթակ հնարավորություն կընձեռնի իրականացնել ավանդական դարձած ֆիլմերի ցուցադրություններ, վարպետության դասեր, ստեղծագործական հանդիպումներ, պրեմիերաներ, հոբելյանական երեկոներ, կլոր սեղան քննարկումներ,  հատուկ ծրագրեր, միջազգային մշակութային նախաձեռնություններ՝ միավորելով երեխաներին, երիտասարդներին և արվեստագետներին աշխարհի տարբեր երկրներից։

«ՄանուՖեստ» փառատոնը՝ որպես լայնածավալ հարթակ՝ նպատակ ունի նաև ներգրավել և անմիջական մասնակից դարձնել երեխաներին և երիտասարդներին հասարակության բոլոր շերտերից, այդ թվում՝ մանկատան, սոցիալապես անապահով ընտանիքների և սահմանափակ կարողություններով երեխաներին։ Մենք ստեղծում ենք միջավայր, որտեղ նրանք կարող են ճանաչել աշխարհը, սովորել, ստեղծագործել և հաղորդակցվել ինչպես իրենց հասակակիցների, այնպես էլ պրոֆեսիոնալ արվեստագետների հետ։

«ՄանուՖեստ» փառատոն՝ 15 000 և ավել մասնակից Երևանից և ՀՀ մարզերից։

«ՄանուՖեստ» փառատոնի մրցութային անվանակարգերն են 

• «Գրան Պրի», 
• «Լավագույն լիամետրաժ խաղարկային ֆիլմ», 
• «Լավագույն կարճամետրաժ խաղարկային ֆիլմ», 
• «Լավագույն լիամետրաժ անիմացիոն ֆիլմ»,
•  «Լավագույն կարճամետրաժ անիմացիոն Ֆիլմ»,
•  «Լավագույն ֆրանսիական ֆիլմ»,
• «Լավագույն Վիշեգրադի ֆիլմ»,
•  «Ես իրավունքներ ունեմ»,
• «Հանդիսատեսի համակրանք»։

«ՄանուՖեստ» փառատոնը հավատարիմ է իր որդեգրած ձևաչափին․ մրցութային ծրագրի ժյուրին կազմված է բացառապես երեխաներից և պատանիներից՝ ապահովելով նրանց ակտիվ մասնակցությունն ու ինքնուրույն գնահատումը:

«ՄանուՖեստ» ՓԱՌԱՏՈՆԸ ԻՐԱԿԱՆԱՑՎՈՒՄ Է ԲԱՑԱՌԱՊԵՍ ԲԱՐԵԳՈՐԾԱԿԱՆ ՀԻՄՈՒՆՔՆԵՐՈՎ։